Fischerspruch

Fischerspruch 2013

von Oberfischer Jürgen Kolb

Guata morga lieabe Fischr,
oimal im Jauhr so viel isch sichr,
zieagt jedr Ma sein Bära raus,
ond füahrt den Samschtigsmorgens aus.

Alls isch nagrichtat heit zom Fescht,
en schena Gruaß an alle Gäscht,
diea gära sei wend au drbei,
wenn mir in Schtadtbach juggat nei.

Onsr Hoimatfescht isch all Jauhr,
oiner von dene Dag gwieß wauhr,
auf den mir lang scho fieabrat zua,
i grieag do oifach gar it gnua.

Vor d´Kanonier land d´Böller bätscha,
ond mir derfet em Schmotz romlätscha,
sott i a wenga Rückschau halta,
was nui war ond was schtoht beim Alta.

It ganz so nui isch dr OBe,
oinr vo eis, des fend i sche,
doch langsam goht´s auf d´Rente na,
des isch ja fascht it vorschtellbar.

Jetzt send´s scho 33 Jauhr,
diea er schtoht eiserm Schtädtle vor,
des isch längscht rekordvrdächtig,
der Ma erscheint fascht übermächtig.

Oinr der´s jetzt im Herbscht scho gschafft,
Jo Miller von dr Landwirtschaft,
er Exminischter grieagt dr Rank,
ond mir wend saga onsern Dank.

Ganz gwieass au füar sein Hoimatort,
haut er eiglegt manchs guate Wort,
es hilft halt viel zu högschte Schtella,
en hoißa Droht hau - it bloß bella.

Es weard scho bald a wenga licht,
dass Memminga behält sei Gwicht,
wenn d´Obrigkeit haut Mittl foil,
ond alle wend da größschte Doil.

Bei Nacht zieaht er seine Ronda,
blosat Horn ond sengt eis Schtonda,
Käser´s Bernd heilt zu de Schtera,
wenn Kenig warsch kasch alls wera.

Beim Vorschtand ond bei viel Gruppa,
hoat ma miaßa d´Schtieahl vrrucka,
weil´s Zeit gwea füar en nuia Grend,
ond au drzua an frischa Wend.

Mir werad sicher it vrgeassa,
was in der lange Zeit alls gweasa,
wer gschtanda en dr erschta Roi,
ond dreht am Rädle immer treu.

Egal was kommt, es lauft halt rond,
onsr Verei isch bumperlsgsond,
wenn´s Poschta geit füar Weib ond Ma,
viel schaffat mit ond schtandat na.

Großbauschtell isch d´Fuaßlaufzona,
inveschtiera weard se lohna,
dass d´Kundschaft it glei packt dr Graus,
legt d´Schtadt an rota Deppich naus.

Alle Schuala werad grichdat,
nui baut, gmolat, Glomsa dichdat,
schtatt füar d´Bildung vo de Kendr,
haut ma s´Geld scho ausgeah mendr.

Jetzt sott ma halt füar all diea Bau,
in Zukonft au gnua Kendr hau,
ond it wenn 15 Jauhr vorbei -
an haufa Klassazemmr frei.

Thema Schtroaß vo Dickreishausa,
noch Hurra – do kennt´s oin grausa,
ja wiea oft haut ma do scho gschwätzt,
doch no isch koi Vertrag aufgsetzt.

Trassa schieabt ma nom ond rom,
zoichnat Plä ond keits me om,
Grund weard gsuachat zom beschwera,
oinr mecht sein Vordoil mehra.

Bei de 40 Schtadtratsgliedr,
wend au viele nomma wiedr,
wenn´s em Frühjauhr gaut ans Wähla,
manche werad ons scho fehla.


Mit s´Mendescht was dr ka bassiera,
dass raucht ond qualmt aus alle Diera,
trotz d´Fuirwehr geit ´Wasser marsch´,
dir d´Bude wegbrennt unterm Arsch.

Wenn alle fut ond s´Fuir aus,
hosch no meh Zora ond koi Haus,
auf oimal schtoaht a Wand vrkehrt,
ond d´Nochbrschaft isch höchscht beschwert.

So gangat Wocha dann ins Land,
d´Ruine schtoaht – es isch a Schand,
land den Wiart des Zuig doch richta,
anstatt Anwaltschrieb zom sichta.

Es wär halt sche zom nächschta Schpruch,
a nuir Bau, a frischer Gruch,
dr Schrannaplatz isch halb vrrissa,
Gäscht dond d´Wirtschaft au vrmissa.

Jetzt alle Bära nauf in d´Höh,
vielleicht hilft ui dr Barthlomä,
Fisch haut´s heit em Bach it wenig,
oinr weard heit Fischrkenig.


Höh!  Höh!  Höh!